193睇死个妹《全民造星IV》入唔到围

人气组合ERROR到屯门出席ViuTV宣传东奥的电视赏活动，4子表示每日会轮流为奥运节目做评述，193（郭嘉骏）踢爆肥仔因要拍MV，要其他成员顶足几日厂期，自嘲是“香港摄时间之王”的保锜即笑言帮到他。肥仔就解释因要跟姜涛为合唱歌拍MV，又预告新歌是香港这几年未出现过的曲风，其他成员即笑他：“教堂嗰啲呀？《爱是不保留》嗰啲？”又即场合唱《主能够》，认真抵死！

而讲到193妹妹郭嘉盈参加《全民造星IV》，193笑言：“我有叫花姐可唔可以畀阿妹入围，但我估阿妹应该入唔到，因为啲人太劲，我个妹好渣。（你事前知唔知？）佢有问我意见，我叫佢唔好搞咁多嘢，因为佢做银行本身高薪厚职，但佢依家连份工都辞埋嚟参赛，可能佢唔知阿哥咁垃圾，做193阿妹冇用㗎，做鲁庭晖（ViuTV高层）个妹先有用！所以呼吁model公司搵我阿妹。”但他都透露已有大品牌搵妹妹拍广告。问到可会过两招给妹妹？肥仔即大爆193曾叫自己教其妹跳舞，但认为应由身为“形体大师”的对方亲自教。

至于阿Dee女友文芊澄亦有参赛，他亦“睇死”女友入不到围：“因为今年有成几千人参加，希望花姐可以开队‘凑人数练习生’，起码家属都有啲谢礼。”193又笑言如果两个家属都未能入到99强，阿Dee就会辞职：“但我就会继续拍广告，仲接埋佢嗰啲。”而保锜又踢爆肥仔有份为《造星IV》“选妃”：“但佢唔系评判，只系搵个位坐低帮手教跳舞。”