孖炎明熹「合體」吸金拍廣告！姜濤嘟晒嘴露為食樣

男團MIRROR人氣王姜濤搵錢從來冇停手，除咗有機會同隔籬台TVB憑《聲夢傳奇》彈起嘅「國民初戀」姚焯菲（Chantel）拍戲外，仲同《聲夢》三料冠軍炎明熹（Gigi）「合體」齊齊搵錢添！兩人分別為潮流玩具Figure商店賣廣告，揸住公仔影宣傳照，而一向為食嘅姜濤攞住「漢堡包」及「雪糕」時開心到擘大晒口，又嘟晒嘴仔咁，迷死一班粉絲！而一向畀人有型嘅炎明熹，就微笑影相，較為含蓄！

除咗炎明熹外，另一大受歡迎嘅《聲夢》甜美系少女鍾柔美（Yumi）都有代言，網民都大讚：「TVB真係識貨好眼光，Yumi真係好靚女！」