李居明籌備新粵劇　賴慰玲米雪都想演

玄學家李居明作品《毛澤東》今晚（23日）於新光戲院舉行拜神儀式，一眾演員齊齊現身。他表示正籌備另一新劇《智擒四人幫》：「因為上次搵呂珊嚟Jam《共和三夢》好成功，所以今次亦會聯同其他圈子朋友一齊再Jam過，演開電視嘅賴慰玲話好想試吓粵劇，米雪又話好想同旭哥（龍貫天）合作，我話呢套四人幫入面嘅江青有年青同年老版，賴慰玲話做年青版，而米雪就想做年老版，不過我仲考慮緊，因為仲有其他人選。」

他指現正和新光戲院業主傾談續約問題：「希望兩星期內有好消息畀大家，因為新光音響好又易Book場，對香港粵劇界係一個重要嘅場地。（主要商討係租金問題？疫情下係咪會平啲租？）我哋當然希望平啲，但身為業主又當然唔係咁諗，依家仲傾談中，大家合作咗9年其實業主都好支持我哋嘅，（續幾多年？）3至5年。」

粵劇名伶陳好逑剛於今午因病離世，龍貫天表示與她相識多年，亦合作過多次：「入行已同佢認識，人生好無奈嘅，望佢一路好走，逑姐好肯扶持後輩，身為正印花旦唔介意同當時做文武生嘅我同台，令我哋吸收咗好多寶貴經驗，係我好尊重嘅前輩。」