【1.7億人爭住睇】趙麗穎化身豹妹索到上熱搜

2021年07月25日 11:01
東網電視
更多新聞短片
內地一線女星楊冪同劉愷威離婚後,協議共同撫養囡囡小糯米,不過近日佢前老爺劉丹就唔覺意爆佢已經成年冇見過7歲大嘅囡囡後,家事即變成網民熱搜。而同佢情況好相似,又係離咗婚,又係有小朋友,同樣係工作狂嘅「死敵」趙麗穎又點呢?答案就喺佢社交網搵到。
趙麗穎就上載條視頻,雖然見唔到佢個樣,但影住一座有直升機、車仔嘅幼兒玩具,架車仔仲喺條軌道度行緊,而另一張圖就見車仔翻咗,期間聽到佢嘅開心笑聲,啲網友就猜佢應該係陪緊2歲大嘅囝囝「想想」玩緊車車嘅玩具,話隔住個mon都感受到母愛。
而早在6月中,用咗1.2億港元喺北京買豪宅自住嘅佢,雞咁腳喺上海機場出現,啲粉絲已經估佢趁唔使拍戲就撲返上海,趕住去見由前夫馮紹峰父母代照顧嘅囝囝。啲網民又翻查佢經理人公司公布嘅月程表,呢個7月就有9日假期,而佢發布玩車嗰日係要開工嘅,不過估佢因為早收工關係,所以又可以陪個仔玩一陣車仔,讚佢係個全職好媽媽,唔會因為工作忙而忽略個仔咁話喎。
呢邊陪完囝囝,轉個頭佢又飛咗去四川成都出席公開活動,以豹紋款式嘅低胸剪裁連身裙現身,配搭埋精美嘅珠寶配飾,加上黑色波浪捲長髮,簡約優雅中透出嫵媚風情,亮眼嘅打扮火速成熱搜,「趙麗穎豹紋抹胸連身裙」呢個題目不足半日已經有1.7億嘅閱讀及討論量,認真犀利!