阿嬌扮攝影師冇人認得出　阿Sa嬲爆：好離譜呀！

組合Twins成員鍾欣潼（阿嬌）同蔡卓妍（阿Sa）合體，擔任內地真人騷嘉賓。阿嬌同阿Sa出發去拍攝現場嗰陣，諗計整蠱已經喺拍攝現場等緊佢哋嘅節目成員于小彤、利路修同李汶翰。當于小彤打畀阿嬌問佢哋係咪嚟緊嗰陣，佢就話畀對方聽好肚痛唔嚟得，只有阿Sa會去，令到于小彤好無奈。

阿嬌決定戴一大頂太陽帽做遮掩，拎住相機扮攝影師，企喺阿Sa後面，混入攝影現場，當佢進入現場之後，全程耷低頭唔出聲，扮到好似好忙咁喺度拍嘢，就算嗰3位節目成員，喺佢身邊經過都認唔出佢，直頭當佢冇到，證明佢扮攝影師，相當成功！

搞咗一大輪之後，阿Sa真係睇唔過眼，叫咗佢哋3個節目成員過嚟，揭穿攝影師就係阿嬌扮嘅，但係佢哋竟然冇人認得出阿嬌，阿Sa仲以為佢哋係扮嘢，特登扮認唔出阿嬌，等阿嬌要全程做攝影師。不過現場睇到佢哋3位節目成員，見到阿嬌現身個表情，極之愕然，唔似係做戲喎，所以阿Sa好嬲咁話佢哋真係好離譜呀！