轉打溫情牌！高海寧送肉嘴賀生日　餅印阿媽搶晒鏡

正所謂「夏天為大地帶來美腿」，最近密密喺社交網派福利嘅咪神高海寧（高Ling），就唔只騷腿，上載泳照大晒34D「胸」器，而尋日（23日）佢轉打溫情牌晒出同媽咪Sweet爆合照，送上肉嘴祝賀對方60歲大壽！

一向孝順嘅佢悉心安排生日飯局，仲準備咗個漫畫《我們這一家》嘅蛋糕，非常有心思，並留言：「願你永遠是個開心幸福的小女人，像花師奶一樣可可愛愛一輩子，被我們捧在手心呵護着。」佢又叫大家唔好吝嗇自己嘅愛，要多啲向家人表達愛意：「簡單的一個擁抱和一句話，都包含着巨大的力量。」又憶起第一次同外婆講「我想你」時，話都未講出口就已開始哽咽咁話！而網民就大讚佢哋兩母女好似餅印咁，都係咁省鏡，仲話伯母保養得宜，似50歲就差唔多！