黃子韜「富二狗」搭私人飛機有位坐 高空3萬呎豪歎美食

20210725
東網電視
更多新聞短片
韓國男團EXO前中國成員黃子韜含住金鎖匙出世,一直有富爸爸黃忠東大力支持,去年黃父不幸病逝,留下逾200億人民幣(約240億港元)遺產畀黃子韜,令佢成為百億富豪。佢不時愛喺社交網大晒名車、名錶,而其私人飛機更老是常出現,多次被指炫富。
近日黃子韜又上載坐私人飛機嘅相片,今次最特別係有神秘嘉賓同行,佢就係邊境牧羊犬新寵Ace。見佢乖乖坐定定喺黃子韜身旁,Ace身形細小,估計只有幾個月大,佢對住鏡頭精靈「微笑」,相當可愛!網民放錯重點,指Ace唔單止有私家位坐,仲有美食佳餚任歎,難怪佢哋話做黃子韜隻狗好過做人,仲話佢同富二代嘅生活冇分別,正宗「富二狗」!之後亦有「落地」嘅相片,雖然未有透露去邊,但見背景藍天白雲,似去咗東南亞地方度假。
黃子韜向來係愛犬之人,本身有摩天使「糖糖」,曾經多次公開「示愛」,指自己心中只有「糖糖」,絕對唔會掂其他狗仔,點知試過喺綜藝節目同其他狗「纏綿」,而今次直頭金屋藏「狗」,網民話佢背糖糖出軌呀!