「廚神」謝霆鋒遭質疑唔識炒餸　嬲爆舉動嚇親人

男神謝霆鋒除咗有演技之外，煮嘢食都有番咁上下。呢日佢喺度炒緊餸嘅時候，竟然有人不停質疑佢嘅廚藝，仲係咁嗌佢放鹽、快啲炒等，佢一路忍住度怒火繼續炒，但係對方冇停過口，話晒有「型男廚神」稱號，畀人咁挑剔法又點會忍得住，佢嬲到一個點時喺枱底攞咗支手槍出嚟放喺枱面，跟住反問對方：「你教我做嘢？」對方即時收晒聲冇再講嘢。

其實呢條只不過係霆鋒同甄子丹主演新戲《怒火》嘅宣傳片，雖然平時見佢都係Chok到爆，畀人好冷傲嘅感覺，但係私底下佢絕對係一位暖男！平時拍親動作戲，佢第一時間都係關心身邊人先，好似拍完一個打鬥鏡頭，佢都會扶番起其他演員，仲細心問對方有冇受傷，除此之外，佢仲會拍一拍對手嘅膊頭，感激對方嘅付出之餘，仲會不時豎起手指公為現場嘅工作人員打氣，所以同佢合作嘅幕後工作作員都大讚佢好人。