連日晒仔「冷落」妻女　余文樂迫到老婆開聲呻

藝人余文樂（樂仔）同太太王棠云有影皆雙，不過最近佢就連日同大仔余初見晒親子時光，鬼咁溫馨，搞到好似佢「冷落」咗老婆同細女余初心咁，唔知係咪怕畀人話，尋日（25日）佢就再次晒出大批仔仔靚相，最後即刻補多張阿女玩緊玩具嘅獨照，雖然繼續唔見樣，不過佢就幫阿女紮咗大大個蝴蝶結上頭，加上肥嘟嘟手仔腳仔確係Cute爆。

樂仔有感而發留言：「陪伴是最好最重要的禮物，幾個月沒見，你們又長大好多了。」似乎係想補償番之前分隔兩地嘅時間，雖然親子感情爆燈，但似乎王棠云就有Say，佢唔客氣留言：「我呢？我也長大了嗎？」呢個「話中有話」嘅問題竟然有逾300個好友畀Like，睇嚟大家都食晒花生等睇佢兩個耍花槍，唔知樂仔會點應對呢？