停播近3個月︱《青春有你3》選手突然宣布成團出道

內地男團選秀真人騷《青春有你3》今年5月初被北京廣電局下令暫停後續錄製，節目製作單位愛奇藝即宣布取消決賽及暫停一切投票通道，一班人氣選手何去何從一直無人問津，當中更傳出「出道名單」及「畢業大合照」，雖然偶有見到成員現身公開活動，不過始終背上停播「污名」，未能得到官方認可。

不過喺尋日（25日）成都一個大型音樂節舉行到一半時，幾位《青春有你3》人氣練習生忽然踩場上台表演，隨後9名練習生一齊上台，正式宣布《青春有你3》成團，成員包括羅一舟、唐九洲、連淮偉、孫瀅皓、劉冠佑、鄧孝慈、劉雋、孫亦航、段星星，同時公布團名為「IXFORM」，意外成為當晚熱點，台下尖叫聲不斷，話題「#IXFORM成團」更有超過5千萬閱讀量並上熱搜，似乎人氣仍然有望翻身。

面對眾人突然喺音樂節上宣布成團，好多支持佢哋嘅粉絲嗌晒感動，恭喜偶像夢想成真，不過亦有觀眾痛批「成團方式太草率了吧」、「好沒有儀式感」、「有種偷偷摸摸的感覺」，引起熱議。