Jer＠MIRROR突破曲風　挑戰唱四聲部

人氣男團MIRROR成員Jer新歌《砂之器》推出短短個幾星期，其MV便衝破百萬點擊，再創佳績！而今次Jer喺呢首歌更挑戰唱4聲部，唱盡高低音轉換：「和音、幾聲部咁，都係今年先開始嘗試，上年自己啲歌冇唱過和音。」相比起《狂人日記》，邊首歌更難唱？佢話：「我諗係呢首，加埋感情上嘅運用好難。（入行以嚟最難唱？）比較唔到，首首都唔同，呢首再要代入親情嘅感覺落去、歌唱技巧又用多咗，邊唱邊諗起媽咪，就再投入啲！而唱《狂人日記》，如果一入到個狀態就好容易唱嘅。」

問到之前咁多首歌都有咁好成績，再出歌怕唔怕難跳出框框有突破？佢坦言唔會：「今次曲風都有突破，聽個Melody係有啲浪漫情歌Feel，以前啲歌都冇，之後會慢慢試吓唔同曲風。」續預告「重生系列」最後一部曲約於年底、10月左右推出：「我諗大家要消化首歌一段時間先，雖然歌詞唔難明白，但係我嘅歌我覺得係需要2至3個月去沉澱、啟發，先有下一部曲，而新歌係籌備中。」