賀師弟張家朗奧運奪金 王嘉爾唔放棄劍擊會有乜成就?

2021年07月27日 11:03
東網電視
更多新聞短片
24歲「香港劍神」張家朗勇奪東京奧運男子花劍金牌,為香港爭光。而曾經係香港劍擊代表隊成員、於韓團GOT7出道後轉戰內地嘅藝人王嘉爾,喺凌晨時段發文祝賀同門師弟奪金:「為你而驕傲,兄弟!真的值得紀念的一天!看了總決賽,恭喜你!🤺🤺🤺🤺🤺現在在回家,回去以後再看幾遍!」其實王嘉爾嘅劍擊成績一啲都唔差,攞過金牌兼喺亞洲排名第1位。有網民推測如果當年佢冇退出劍擊界,呢位「K-Pop 劍神」係咪都有機會攞到奧運金牌呢?
王嘉爾出身自運動世家,爸爸係有「亞洲第一劍」之稱、曾經喺亞運會攞過金牌嘅王銳基。佢10歲接觸劍擊運動,12歲參加全運會攞到人生第一面劍擊金牌,曾經畀韓國星探睇中,不過當時因父母反對而繼續劍擊運動。
雖然喺劍擊界發展唔錯,不過王嘉爾一直都冇放棄過明星夢,2011年向父母表明心願到韓國娛樂圈發展,爸爸同佢打賭:「如果你喺亞洲攞到金牌就畀你去。」而兩個月後正正就係亞洲青少年錦標賽,當時佢積極備戰,但係賽前意外扭傷腳踝,原本打定輸數,點知最終贏咗少年組男子花劍個人冠軍,就係咁父母先同意佢去韓國JYP公司做練習生。當時佢除咗放棄征戰倫敦奧運嘅機會,更加放棄咗香港大學同埋美國史丹福大學錄取通知,犧牲咁多嘢,最後都順利喺2014年以男團GOT7成員之一出道。
2014年佢喺內地成立工作室,之後中韓兩邊走人氣持續上升,參加過好多綜藝節目吸金力強,齊睇佢上年斥資3,880萬港元買入九龍站物業一個單位,就知佢撈得有幾掂。王嘉爾有天賦亦有實力,加上事事搏到盡爭取好成績,有網民估計佢憑住呢種不屈精神,如果冇離開劍擊界的話,隨時有機會喺倫敦奧運攞到金牌都唔定!
除咗王嘉爾之外,人氣爆燈嘅男團MIRROR成員姜濤亦有出post恭賀張家朗奪金,表示:「真心為你開心,真的不容易,辛苦了!」而同隊嘅Anson Kong則大讚張家朗有型。