林作又抽水　出10萬撩「劍神」張家朗揮劍一場

十優港姐麥明詩舊愛林作抽水抽到出晒名，惟佢曾因借《黑豹》男星Chadwick Boseman死訊宣傳保險被狂插，又因暗寸鍾培生而爆發9月舉行嘅百萬拳賽「林鍾之戰」，抽水變成「抽火水」。昨日（27日）香港「少年劍神」張家朗摘下香港史上首面奧運劍擊金牌，林作都有出甫抽水，佢突然表示會喺拳賽後轉學劍擊，學足半年後挑機張家朗，更聲稱要出10萬邀請對方：「我決定意思意思，出10萬元出場費畀佢同我揮劍一場。等佢日本歸來，我同佢傾傾。」

惟此舉即引來網民反感，狠批：「多咗，咁只會黑人憎」、「人哋畀番20萬你叫你唔好煩佢」、「尊重吓人啦，好多嘢都可以講笑攞彩，但呢樣嘢真係一啲都唔好笑，對一個運動員來講這樣的一個玩笑並不可笑。」