余曉彤潛水頭髮纏珊瑚險出事

2021年07月27日 21:02
東網電視
更多新聞短片
好彩有驚無險。
藝人余曉彤(Hidy)「兼職」任潛水教練及海洋平台老闆,日前應香港開電視之邀到小棕林示範浮潛。Hidy表示接觸潛水已是16年前的事,「處女下海」亦在小棕林:「呢個地方係初階學潛水嘅人經常去嘅地方。第一次都有啲驚,因為減唔到壓搞到耳朵好痛,當時下降太急嘞。」
她又指香港很多地方都適合潛水:「因為我們嘅海岸公園有好多美麗嘅珊瑚,尤其硬珊瑚品種其實比加勒比海仲要多,只係夏天水質相對比較渾濁啫。」Hidy早前與友人組織海洋平台,旨在推廣海洋知識:「可能好多人都以為海洋文化唔關自己事,但我希望就算唔玩水上活動嘅人,都會覺得大海屬於自己嘅。」
她又提醒大家潛水時一定要注意安全:「一個人潛水係最唔能夠接受嘅,一定要有個伴。有次我自己徒手潛水,因為需要拍攝,唔可以有其他人落水貼近。岸上嘅拍攝團隊叫我同啲魚自拍,我玩得太得意忘形嘞,潛到水底四、五米畀珊瑚纏住頭髮上唔到嚟。我心想死梗嘞,最後我掙扎咗好耐先成功,珊瑚纏住喺頭髮咁上水囉。」