「混血飛魚」何詩蓓奪奧運銀牌　方力申哽咽落淚：好激動

繼「香港劍神」張家朗勇奪東京奧運男子花劍金牌為香港爭光，23歲「混血飛魚」何詩蓓於女子200米自由泳決賽，以1分53秒92打破亞洲紀錄勇奪銀牌，取得港隊史上首面游泳獎牌！唔少藝人早已坐定定喺電視前，齊齊觀賞神聖嘅一刻，對於女飛魚奪銀，大家都非常興奮，於社交網留言祝賀。

曾代表香港出戰奧運嘅「飛魚王子」方力申（小方），今年有份採訪東奧嘅佢，晨咁早已抵達現場霸佔最有利位置採訪何詩蓓。對於何詩蓓勇奪銀牌，小方一度哽咽，忍唔住落下男兒淚：「好激動，呢面牌真係好難，游水真係好難！好多問題未問完，但...遲啲再問。作為土生土長嘅香港人，大部分訓練時間喺香港，對我哋係一個好大嘅鼓勵。香港嗰個讀書壓力好大，好多人中間會放棄（游水），游得好嗰幾個先會繼續游。」

而歌手謝安琪亦晒出何詩蓓游泳英姿留言大讚「太有型了」；藝人洪永城睇好下屆巴黎奧運能勇奪金牌：「已經叻到癲，恭喜晒，只係23歲，巴黎再攞金牌。」王敏德、鄭裕玲、郭晉安等亦紛紛留言祝賀。