最佳奧運主持︱方力申踩足26個鐘　捱飯盒嗌爽

隨無綫攝製隊直擊奧運實況嘅方力申（小方），尋日（28日）佢做足功課訪問香港女飛魚何詩蓓為香港喺奧運游泳項目上贏得銀牌，鏡頭後佢就激動到哽咽落淚，真係差啲要送個「最佳主持獎」畀佢！而此行小方盡心盡力嘅一面，大家真係有見共睹，上一次訪問香港「劍王」張家朗佢就自爆要凌晨一點半先有得去買外賣，跟手直踩到第二朝8點再出發。

今次佢原來係Chur到相隔26個鐘先有第一啖嘢食落肚，不斷做嘢加趕行程，搞到凌晨12點半先食第1餐，而佢又又又食外賣，佢同同事就惟有喺酒店走廊進餐，明明喧辛酸，小方仲大讚該餐廳嘅食物又平又正，50蚊港紙就已經有滑蛋豬扒飯加牛肉飯，仲舉晒V咁Selfie，佢嘅「體育精神」真係一樣令人讚嘆。