發生咩事？陳自瑤試新造型勁爆：想去趟非洲

火辣人妻陳自瑤（Yoyo）早前拍攝短片時，性感大解放用草帽遮胸扮全裸，呢日佢再次挑戰自己，不過今次就唔係行性感，而係同星級造型師馬天佑合作，嚟個形象大改造！其實Yoyo事前並唔知會改造成點，妝髮團隊趁住佢同馬天佑閒聊時一直默默趕工，點知當佢回過神來，先驚覺自己頭上綁了多條小辮，笑指驚變「十兄弟」髮型！

原來Yoyo換上嘅係「雷鬼頭」（Dreadlocks），就連Angelababy同G.E.M.都試過呢個髮型，對於呢個新嘗試，Yoyo坦言覺得好爆：「哇！係咪好爆？我自己都覺得好爆，發生咩事呀？我要去一去非洲。」

之後，佢再換上多套超誇張造型，其中一套佢更以粉紅色荷花裝上陣，相當搶眼。而佢喺馬天佑指導下，成功嘗試好多昔日唔敢擺嘅甫士，十足名模一樣，佢又表示好開心能夠突破自己：「可能大家會話呢個完全唔似我、平時靚啲，但我覺得人生咩都要試吓，平時影嗰啲相我都仲有好多機會可以影，但呢啲咁特別嘅造型唔係個個都會幫我設計，所以我都好珍惜呢輯相。」