【娛刺撈飯】勇敢認愛!AL出櫃更紅

2021年07月29日 19:22
東網電視
更多新聞短片
MIRROR出道後極速爆紅,一套《大叔的愛》仲將Anson Lo同Edan嘅人氣進一步推向高峰,不過人紅自然是非多,Anson Lo最近就畀人「翻舊帳」,話佢喺2016年曾經公開「出櫃」,唔怪之得做凌少牧呢個角色,可以做得咁入型入格。
以前好多人一聽見同性戀三個字,就即刻戴起有色眼鏡睇人,笑人哋死基佬、死基婆、格劍、磨豆腐都係小兒科,真係再難聽嘅說話都有,總之就有咁盡踩咁盡,令到同性戀者只能夠屈住屈住,收埋自己。
但係大佬呀,依家咩年代呀,21世紀都過咗20年有多,其實普羅大眾對於LGBT嘅接受程度已經高咗好多,好多人就算唔出聲撐,亦都唔會開聲鬧,無可否認,佢哋仍然係性小眾,不過今時今日仲攻擊人哋嘅性取向,只會顯得你思想迂腐落後囉。
係嘅,早二、三十年前食娛樂圈呢行飯,唔好話天王巨星,就算係半紅不黑嘅奀星,好多時都只會搞地下情,甚至隱婚,佢哋之所以要咁做,無非為咗塑造一種偶像只屬於粉絲嘅形象,藉此吸納粉絲同Keep住人氣。
不過今次Anson Lo被翻出所謂嘅「黑歷史」之後,唔少人持開放同support態度之外,一班「鏡粉」、「神徒」都話撐到底,講明只會欣賞Anson Lo嘅才華同努力,更加唔會因為偶像嘅性取向而「脫粉」,而Anson Lo喺社交網出嘅甫,甚至比以往多咗人留意同讚好,咁樣證明咗啲乜?證明娛樂圈生態已經轉變,偶像已經唔再只係屬於粉絲,偶像都可以擁有屬於自己嘅私生活。
再講吖,相比早兩年哄動一時嘅「安心偷食」同「多人運動」,甚至係最近爆出嘅「酒局選妃」,呢啲喺世俗眼中被批評為「渣男」嘅行徑,Anson Lo既唔係出軌偷食,亦唔係約局搵一大班人集體「做運動」,佢唯一所做嘅,只係勇敢認愛,公開自己嘅性取向,莫講話對其他人造成嘅負面影響近乎零,反而有男男拍咗拖兩年唔敢講,多得《大叔的愛》熱播先有機會同屋企人攤牌,最後得到祝福。一套BL劇可以畀到人勇氣踏出難行嘅一步,追求自己真正需要嘅愛情,喺呢個多元文化社會唔係咁都有錯呀嘛。