吳若希驚變阿梅 蔡嘉欣似足紙紮公仔

20210729
東網電視
更多新聞短片
藝人吳若希(Jinny)與《姊妹淘》拍檔蔡嘉欣早前「世紀破冰」,近日佢哋再次合作拍片互相為對方化妝,其中Jinny指蔡嘉欣貌似一代女神張敏,故特意為佢化上仿張敏妝容,而蔡嘉欣則指會為Jinny改行歐美路線。點知一開始就已經「出事」,蔡嘉欣為Jinny化眼妝時,竟然將眼影勾到出太陽穴,加上超長眼線,之後再化上超大陰影,令Jinny即忍唔住笑指似電影《少林足球》中飾演「阿梅」嘅趙薇。不過蔡嘉欣就死撐呢個超霸氣眼妝係別有用心:「你去到巴黎唔想畀人偷嘢嘅,呢個妝啱晒,對眼夠晒惡!」Jinny就表示:「我知點解擊退到人,因為啲人心諗『呢個人係咪有病』。」
輪到Jinny幫蔡嘉欣化妝,本來都好正常,但到化唇妝時竟然化厚兩倍,蔡嘉欣即指:「好似孖膶腸,原來吳若希嘅實力都不過如是。」之後Jinny索性改妝,用唇膏化上紅色超大眼影,蔡嘉欣見到最後成果時,即笑到收唔到聲,激動表示:「好樣衰呀!多謝吳若希,我未見過咁樣衰嘅自己,呢個肯定係紙紮公仔妝。」