孖AK@MIRROR合唱 太極自封「半肥瘦」鮮肉

2021年07月29日 21:08
東網電視
更多新聞短片
殿堂級樂隊太極今日(29日)為8月7及8日假紅館舉行的《Rainbow After Rain演唱會》綵排,甫受訪結他手成員「HiFi德」劉賢德自爆黑仔,左手連環受傷,更有「豬手相」為證:「開騷前諗住去揼骨⋯正經嘅!個醫師話我膊頭硬,點知屈住隻手一按就傷咗條筋,然後有日敷完藥想噴香水,又點知跣手畀支香水揼到手指尾腫咗!依家冇咁腫,有慢慢好番,都彈到結他嘅,但整親嗰陣真係好驚!」
講到邀請男團MIRROR成員AK擔任嘉賓,鄧建明(Joey)大讚對方首《黑之呼吸》出色,屆時會齊齊Jam歌:「好似佢都想唱我哋啲歌,或者嚟個Rock Medley。」並自嘲做罐頭午餐肉,因為有防腐劑,又搞笑話跟小鮮肉交流就變「半肥瘦」。
另外,HiFi德表示是次練歌比平時耐,花多過一倍時間呆坐品嘗已逝成員唐奕聰(Gary)的作品:「以前都冇咁留意,真係好掛住佢!」到時會否擔心爆喊收場?他避答,續說有些歌會避聽,即被Joey笑話:「咁唔得喎!一定要聽,到時彈錯Gary笑你!」