弊傢伙︱黎諾懿激嬲大肚妻　搞咩整到仔仔耳腫兼發燒？

藝人黎諾懿同太太李潔瑩（Nicole）育有一子「小春雞」，早前佢宣布太太再懷孕，一向係「愛妻號」嘅佢，依家湊仔嘅重任都落晒去佢身上，等太太可以好好咁抖吓。點知Nicole今次就喺社交網爆料，指最近帶阿仔去朋友屋企玩，點知黎諾懿就畀「小春雞」去花園摘龍眼，唔夠一陣竟然阿仔變咗「豬頭」，畀蚊咬到右耳腫晒，好似成隻假耳仔咁，加上有輕微發燒，食咗抗敏藥都仲好腫，搞到第二日要去睇醫生。見到李潔瑩段文字已經咁有火，唔知最後黎諾懿有冇跪玻璃賠罪呢？