處男下海拍美容廣告　王梓軒愈忙愈開心

入行12年的歌手王梓軒，最近處男下海拍美容廣告，他笑說：「我未拍過美容廣告，咁多年嚟都有少少唔開心，因為經理人成日都聽到人話：『梓軒啲皮膚都唔錯吖，不如拍美容廣告！』佢次次都話好，但都冇做到，我覺得嘥咗我嘅青春，所以趁呢幾年把握好機會。」

今次廣告拍攝有兩個造型，分別係美容專家同偵探，他說：「今次有個新玩法，就係『女朋友視覺』，我去到呢啲位就有少少怕醜唔係好敢，但今次畀我玩吓，又幾好玩。」

最近他忙於為無綫新節目《演鬥廳》做音樂，忙到連假期都冇，他說：「其實我個人好得意，太得閒我會好唔開心，即係自己嘅生產力同存在感好低，所以愈忙就愈充實。」