蔡卓妍用腳撐電單車行似鴨仔　最想回到27歲原因係…

組合Twins成員蔡卓妍（阿Sa）最近同鍾欣潼（阿嬌）合體亮相內地真人騷，大膽挑戰各種不可能的任務，好似去咗森林玩「魔鬼鞦韆」，阿嬌做司機揸電單車載埋阿Sa，大玩《甜蜜蜜》情節等，最終都能完成任務！

呢次就到阿Sa玩「飛車」，但係唔太識揸電單車嘅佢，不時只能擘開雙腳踩住地下推架車行，遠睇個動作就好似鴨仔行路，而有網民話佢呢個動作似曾相識，同周星馳喺《逃學威龍2》入面，用腳撐住電單車行一樣，認真搞笑！

而阿Sa同節目其他成員包括李汶瀚等打邊爐嗰陣，佢就有感而發覺得自己老嘞，覺得自己體力大不如前，如果可以回到過去嘅話，佢最想回到27歲，因為嗰陣佢雖然好忙，但係體力真係好好，最緊要個樣冇皺紋呀！不過唔少網民就讚阿Sa個樣十年如一日，出道咁多年嚟都冇變呀！