「一姐」變新人!菊梓喬苦練半分鐘喊出嚟

2021年07月31日 22:02
東網電視
更多新聞短片
無綫「最受歡迎女歌星」菊梓喬(Hana)喺無綫劇《刑偵日記》度,飾演「小說殺手」之一嘅「海藍」,雖然佢家陣仲係「星夢一姐」,地位高高在上,不過跳到戲劇組就係新人,所以一個唔算好多戲嘅角色都要爭餐死。佢喺電台訪問度話:「其實個角色係好辛苦先得番嚟,要同其他女演員爭,但唔開名啦,仲要經過重重面試,喺試戲前,我要熟讀劇本,又要練喊戲,其實喺冇音樂襯托下,我真係好難喊到嘅,不過我自己喺屋企練到半分鐘內喊到出嚟。」佢覺得面試最困難喺不斷重複嗰一場戲,仲要喊出唔同嘅層次,真係好大壓力。
講到首次正式拍劇就同兩屆視帝王浩信做對手戲,佢覺得最辛苦竟然係26cm嘅距離,佢話王浩信好高:「我哋好有距離感,佢視線係望住我頭殼頂,我就要望佢下巴,搞到我條頸好攰。」佢仲話王浩信同古巨基一樣好鍾意唱歌:「佢好好笑,不停咁講音樂唔係講做戲,佢講自己喺外國點學唱歌,學樂理,點唱歌同運氣先係好囉,連導演都一齊傾。」似乎王浩信嚟梗想挑戰攞「最受歡迎男歌星」喎。