又關王菀之事？炎明熹高EQ回應負評　爆粗獲讚可愛

身為無綫《聲夢傳奇》三料冠軍嘅炎明熹（Gigi）雖然只得16歲，但向來對答有紋有路，大方得體，不過佢早前拍片回答網民問題時「瀨嘢」，疑似爆粗！片中原來工作人員叫Gigi先讀出網民嘅問題，點知佢睇完問題就問：「係咪要讀出嚟呀？」工作人員話係，跟住佢已面有難色，笑咗幾次後，就好乖咁跟稿讀話：「邊x度…」，當然條片去到呢個「x」位，即刻「嘟！」一聲消音，全場人起哄兼大笑，拍掌大叫：「好！」

之後條片再錄過，原來有個網民批評Gigi：「邊x度似王菀之，喺度Chok聲仲要走音，唱歌差一萬條街。」嘩！個評語有冇咁Mean呀？Gigi只係新人又係細路咋喎！不過Gigi兜口兜面畀人寸，一啲都冇嬲，仲發揮佢來自火星嘅高EQ，好可愛咁話：「幾萬條街應該都幾幾幾長吓，幾萬條街即係…，好多條街，其實我都唔知道自己似唔似王菀之，Chok聲我唔係特登嘅，但係可能我自己無啦啦，就會唱咗Chok聲出嚟，令到你唔鍾意啦，唔好意思呀。」啲網民睇完條片就狂讚Gigi「好打耳」兼好高EQ，而且又有金句，同時有網民怪工作人員：「冇睇稿就畀佢讀」，Gigi今次咁好表現，又攞到高印象分！