學霸女兒有人追？林文龍：有男同學想攞佢電話！

藝人林文龍出席頭髮護理活動，透露最近工作繁忙：「戚其義監製的網劇《逐流時代》剪緊片，及製作預告片，公司又有新節目進行中。（想今年出街？ ）希望啦，不過後期相信最快都要搞到9月。」

未遇到吸引劇本

問到會否再拍劇？他坦言未遇上十分吸引的劇本：「但（手頭上劇本）都可以研究吓同改進嘅，我哋抱開放態度，冇特定想拍咩片種。（好似《大叔的愛》咁都得？）我哋喺網劇，冇咁多掣肘，真係乜題材都可以嘗試。（其實你有冇戲癮？ ）有㗎，不過如果我拍兩個月戲，公司工作邊個做？（太太郭可盈幫手？）佢掛住睇奧運，我出門口佢都冇反應！」

提到11歲女兒天若成為學霸，他說：「佢只係成績幾好，自律性足啫，一星期最多補一日習，做功課好快。（佢冇乜課外活動？）佢有學小提琴，得閒我會帶佢去游吓水。其實佢動靜皆宜，不過有時比較文靜，鍾意同屋企傭人姐姐玩。（開始青春期喎。）依家已經有男同學話幫佢孭書包，希望攞到佢屋企電話，好彩我教咗佢電話唔可以亂畀人，同埋佢性格比較保守，唔使擔心。」