【恭喜恭喜!】李元元大肚!經手人係......

2021年08月02日 21:42
東網電視
更多新聞短片
「最萌星二代」李璨琛囡囡李元元於網上人氣高企兼粉絲無數,原來就連藝人胡杏兒大仔李奕霆(Brendan)都「拜到佢石榴裙下」!呢次兩位星二代難得同框,Brendan一見到元元即刻冧爆笑晒口,之後佢哋仲拖到實一實,兼興奮舉起V字手勢,十足一對小情人。爸爸李乘德即笑Brendan「拖着女仔的招積樣子」,而胡杏兒好友胡蓓蔚留言:「Future daughter in law(未來新抱)!」
咁都未夠,原來Ryan冧女有一手!元元媽媽網晒Ryan錫錫元元面珠嘅相,仲搞笑留言畀李乘德:「無端端畀人強吻,我一個如來神掌推開佢。#面有難色#喂你個仔做咩事先」跟住元元媽媽再晒個女嘅「大肚相」:「都講咗唔可以錫錫啦!一錫完就有咗BB喇,麻煩晒!」原來元元佗住嘅「BB」,其實係元元坐喺媽媽膊頭時,用條裙冚住咗阿媽個頭,所以有呢個「大肚」效果!以上相片引起哄動,唔少網民畀Like之餘,仲話李璨琛同胡杏兒可以對親家!