林允化身小龍女　網友寸似泥鰍！

身為周星馳愛將嘅內地女星林允最耍家係扮美人魚，最近佢越級挑戰，為拍內地綜藝節目《萌探探探案》，化身做「小龍女」。美人魚變小龍女，一身飄飄白衣，仙氣爆燈，網民仲話最like佢個小酒窩，仲將佢同上一代小龍女劉亦菲比較，話佢哋嘅酒窩各有美態，又話林允唔笑時有懾人嘅冷傲感覺，簡直係一位「會行會走嘅冰山」，仲話好願意死喺佢嘅玉女劍法之下添！

讚到天上有地下無，世事冇完美！有網民話唔多Like林允呢個Look，覺得佢本身係條美人魚，天生就係池中物，理應住返喺條河度，而唔係匿埋喺古墓，仲話佢額頭前面嗰兩撮頭髮係最敗筆，似足泥鰍嗰兩條觸鬚，叫佢快啲跳返水先生存到。有網民仲好搞笑咁話，如果周星馳見到，唔知會唔會用電影《食神》經典對白：「失敗！失敗中嘅失敗！」嚟寸佢呢？其實林允似小龍女又好，似條泥鰍都好，既然咁有話題，周星馳可以住個勢，開番部電影《泥鰍》！