【少女版全智賢】13歲金詩雅靠眼神演戲　升呢小影后！

演戲好講天分，有人天生就係做戲材料，年紀輕輕就已經好好戲！最近韓劇《屍戰朝鮮：雅信傳》熱播，劇中演女主角全智賢少女版嘅金詩雅，年僅13歲就已經演技細膩，作為劇中前半段嘅重要主角之一，佢透過眼神嚟演戲，令大家感受到佢嘅哀傷，成功帶動觀眾入戲，因而大獲好評！而佢除咗有演技，仲有精緻嘅五官，同埋清純嘅氣質，望落同全智賢有啲似樣，而佢私下原來係陽光女孩，最近仲剪咗一頭短髮，大晒青春活潑嘅一面！

其實佢喺2018年就出道拍戲，演過唔少作品，而佢嘅首部作品《白小姐》，飾演長期受到暴力虐待嘅小孩，佢唔單止要喺鏡頭前演出脆弱一面，仲要有唔少內心戲，呢個角色好考演技，就算係資深演員都唔容易駕馭，結果佢不但可以活演角色，仲可以成功感動觀眾，最終奪得最佳童星獎，以及最佳女主角獎，榮升小影后。之後佢喺電影《白頭山：半島浩劫》中，飾演李炳憲嘅女兒，喺劇中一句對白都冇，全靠眼神表達出角色豐富情緒，難度極高，可謂完全展現出佢嘅演戲天分！