連嘟嘟都追問波鞋事件！193寸爆：拍個廣告都買到廿對

組合ERROR成員193（郭嘉駿）早前出Post求限量版波鞋，豈料被作家兼KOL指佢?鞋，仲話：「明星，唔係咁做的。」引來193親自留言「你真係唔識㗎喎」還擊，而該KOL之後宣布「辭職」及表示：「對193也沒深仇大恨，也多得3爺留言教訓，個人引起思考/討論不果，卻引起太多粉絲的不安，是我言論過於偏激，有失KOL的責任。」

而尋日（3日）ERROR就上咗鄭裕玲（嘟姐）主持嘅電台節目受訪，連嘟姐都忍唔住追問波鞋事件，193表示該對波鞋好犀利，係三方聯名出嘅，喺外國都冇可能買到，所以嘗試出Post搵鞋：「睇吓有冇人幫到我手，無論係抽又好，公關、水貨店幫我又好，想有個途徑可以攞到對波鞋，我超想要！」仲好霸氣話：「同埋我絕對畀得起錢，因為其實我拍一個廣告可能都買到十對、廿對，點解啲人會話我想要免費波鞋呢？如果佢有睇開我不嬲儲嘅波鞋，就知個對其實唔算係啲咩貴波鞋！」佢又透露該品牌有直接聯絡佢，但直指呢對鞋任何人都留唔到，就算畀錢都買唔到！