粉絲凌晨守候︱Tiger唔敢提余潔滢 要靠好兄弟AK解圍

20210805
東網電視
更多新聞短片
人氣男團MIRROR成員Lokman、Anson Kong及Tiger今日(5日)現身中環出席活動,為一睹偶像大批鏡粉一早已到場守候,有粉絲更早於凌晨4時在商場門外待商場開門,3位偶像到場粉絲即時起哄尖叫,不過到記者訪問環節粉絲亦非常識做安靜下來。被問到近來活動都引來粉絲凌晨到場通宵排隊,會否擔心粉絲安全,Lockman坦言每次都有擔心:「尤其近排落雨天雨路滑,佢哋喺出面等又熱又焗都辛苦嘅,上次屯門就更加,有人再早一日就嚟排,商場閂門要喺外面等,真係會心痛㗎。」
問到近期MIRROR幾乎囊括大部分廣告,Lokman表示:「仲有ERROR㗎,不過係好事嚟嘅,出面都靜咗咁耐,唔介意多啲嚟密啲手。」問到身形弗爆的AK會否接拍內衣廣告,他表示不抗拒,最想拍新車廣告,身旁Lokman打趣説最好包括維修及相關產品「一條龍服務」。2人表示正為新歌拍攝MV,一樣會「熱力澎湃」不停跳舞,預計本月推出,AK說:「感覺同以往有少少唔同,首歌力量比較『野蠻』,曲風接近歐美類型,係香港比較少有嘅跳舞歌。(有冇除衫騷肌?)露下手臂咁啦。(咁少?)留番下次演唱會再大隻啲再露啦。」Lokman補充:「唔少事㗎,平時我哋都係冬裝嘛,露手臂好大件事㗎啦,哈哈。」
Tiger則表示近期剛與MIRROR成員Alton、Lokman及阿妹(岑樂怡)拍完一輯節目,預計9月出街。近日與余潔滢(Zoe)傳出緋聞的他,被問到有否送首飾禮物氹對方歡心?身旁AK見狀即出手替他解圍説:「我阿媽都生日喎,你揀咗生日禮物畀佢未呀?仲有我阿哥都係呀,佢哋追你上嚟食生日飯呀。」不過最終Tiger都帶點尷尬地回應:「佢唔鍾意呢啲應該,男仔頭,送啲運動嘢畀佢啱啲。」Lokman説盡量會帶同女朋友一起去揀禮物:「開心啲嘛,一齊揀唔使驚揀錯畀佢。(咁耐冇試過揀錯?)好多時送手袋畀女友,預期佢打開包裝會好驚喜咁嘩一聲,但通常一打開都係『哦!幾靚吖隻色』。」AK則表示剛入行有較好收入後送過鍊給媽媽,以往拍拖亦有送頸鏈及手鐲予對方。