奧運︱全城祝賀乒乓女團奪銅牌 麥明詩:即刻認親認戚

20210805
東網電視
更多新聞短片
香港乒乓「一姐」杜凱琹與李皓晴及蘇慧音今日(5號)聯手撼贏上屆銀牌得主歐洲勁旅德國,勇奪女團銅牌,寫下女子乒乓球歷史。唔少藝人睇到手心出汗,贏賽後紛紛於社交網祝賀,興奮程度似足自己落場一樣!與蘇慧音及李皓晴同讀拔萃女書院嘅前港姐麥明詩,亦於限時動態寫道:「我啲DG(拔萃女書院)師妹好勁!!即刻認親認戚。」
遠赴東京採訪奧運嘅方力申留言:「恭喜銅牌得主,香港勁揪!」而熱愛跑步嘅洪永城老婆梁諾妍,亦晒出蘇慧音英姿表示好激動:「又一香港歷史性一刻!!!多謝香港運動員多謝堅毅不屈不放棄精神!!!」陳貝兒引用教練李靜金句送祝福:「『奇兵出奇蹟!』『多謝自己!!』乒乓波女團銅牌!杜凱琹!蘇慧音!李皓晴!多謝!!李靜教練好波好嘢好句!」戴祖儀、周志康、英皇金牌經理人霍汶希、關寶慧等亦有出post祝賀。