李佳芯重提“咸湿”床戏　陆永畀江欣燕啜颈！

视后李佳芯（Ali）与陆永、冯盈盈、简淑儿、麦美恩等，今日（6日）现身电视城为热播剧《智能爱人》造势，席间众人大玩测谎游戏，江欣燕被问到跟陆永拍亲热戏时可有心跳加速？她笑言只记得当时要锡对方条颈，觉得又咸又湿：“咁嗰时夏天嘛！流汗就咁。”然后再即场“案件重演”，陆永自动拉低件衫埋位，江欣燕就作状锡落去，笑爆全场！

最肉搏场口

活动后Ali跟陆永受访，重提“又咸又湿”一事时，陆永说：“嗰时大热天时着长袖衫拍，梗系湿晒！”续笑言大家都羡慕他拍此剧好有艳福，谂深一层的确如此，最肉搏的场口就是跟江欣燕上演床戏：“好大心理关口㗎⋯系讲对江欣燕嚟讲！”Ali醒目追问：“咁咸呢？”陆永再笑说：“呢场床戏系喺海边、游艇入面张梳化上面‘吸啜’，个故事设定几好嘅，江欣燕觉得我个样太差，净系锺意我条颈，所以就拧转我块面，系咁锡我条颈！”Ali闻言笑到收唔到声，话要等播出时慢慢“品尝”。

有小朋友扮Ali

新剧播出数天，他们表示都有捧场，其中陆永指两个囡囡终于知道他有份演出，又大爆她们扮Ali剧中“阿宝”大肚：“因为佢哋睇完奥运直落睇剧，用Cushion塞落肚扮大肚，然后学埋台词同我讲‘有心、有心’。（你可以当佢哋机械人？）又唔系！系佢哋当我机械人使我做嘢！（佢哋有冇学Ali喺街市嗰幕嘟嘟声爆粗？）佢哋冇睇嗰集。（对你做戏有咩评价？）冇，佢哋净系锺意阿宝。”Ali开心谓知道有小朋友扮演她觉得好得意，证明剧集富娱乐性。