黃建東孖蔡頌思親密互動：佢係我老婆！

「40億千金」蔡頌思（Jocelyn）與黃建東（東東）日前現身尖沙咀海旁，兩人齊以運動裝上陣，東東身穿白Tee配運動褲，Jocelyn則穿露腰裝加貼身褲大晒小蠻腰。他們先做熱身，Jocelyn將雙腿向下壓，東東再助其一臂之力，用雙手推其玉背，之後他們一齊單腳企向後拉筋，但東東平衡力欠佳，要搭着女方的肩膊才站穩腳，兩人邊傾偈邊熱身，聊得相當開心，期間Jocelyn被對方逗得笑到彎腰。熱好身後，他們便沿海旁一帶來回跑步。

跑了大半小時，他們便到附近咖啡室稍作休息，點完餐後，Jocelyn先搵位，東東負責拿着兩人的飲料及食物，大顯紳士風度。東東將乳酪與Jocelyn分甘同味，舀一匙羹讓對方品嘗，之後他們便拿出劇本仔細研究，並不時相視而笑，氣氛愉快。

事後記者致電Jocelyn，講到日前約會，她否認拍拖說：「我哋嚟緊有個舞台劇要合作，東東話佢要減肥，我又要減，所以約埋一齊跑步，順便讀吓劇本，因為之前圍讀我唔在場，我哋係男女主角，好多對手戲，所以想面對面讀一次。」她稱今次是首次跟對方合作，甚覺有緣，兩人一拍即合：「大家好快就好老友，好好傾。（有冇發展機會？）完全冇諗過。」

至於東東就開玩笑說：「我哋唔拍拖，我哋係結咗婚，佢係我老婆。我係講緊我哋套舞台劇《老公你好悶呀！》，我哋飾演夫妻。因為要為舞台劇準備，所以一齊做運動，導演落咗命令一定要我瘦番，我要瘦多2、30磅。」他大讚Jocelyn是一個聰明又有天分的演員，大家合作會事半功倍，又指要努力刨劇本及練好體能：「到時要抱起佢、抬起佢都冇問題。」問到發展機會，他坦言對方貴為40億千金，甜美又青春，自己不敢多想。