熊黛林老公生日　寶貝孖女化身小公主

名模熊黛林（Lynn）與郭可盈細佬郭可頌於2016年拉埋天窗，婚後誕下一對孖女Kaylor及Lyvia，一家四口幸福滿瀉。近日郭可頌生日，一家人一如以往為佢慶祝，郭可頌於社交網大晒全家福合照，見兩公婆一人抱住一個囡囡，而孖女就齊齊着上粉紅色背心裙並戴上髮箍，十足小公主一樣，相當可愛。

身為廿四孝老婆嘅Lynn亦特意準備由多個表情符號圖案馬卡龍組成嘅生日蛋糕，非常有心意。郭可頌亦非常滿意呢個生日，留言指生日周正式開始，更表示：「Family first」，除指首先與家人慶祝外，亦有「家人第一位」嘅意思，認真冧到爆。