黃建東又爆料！東涌羅浩楷《愛．回家》造型曝光

藝人黃建東早前於社交網晒出與「東涌羅浩楷」利愛安嘅合照，失手意外「踢爆」對方加入處境劇《愛．回家之開心速遞》，今日（8日）2人再度於電視城相遇並集郵合照，而黃建東又再一次「爆料」，令利愛安嘅新造型率先曝光。見向來一頭爆炸曲髮嘅利愛安，最近微微拉直頭髮，變成微曲長髮造型，即時回復少女味兼滲透仙氣，不但獲黃建東笑指「無晒佛味」，更有網民大讚同前港姐朱千雪有幾分撞樣！

另外，雖然2人只係見面數次，但利愛安相當有心，不忘向剛過生日嘅黃建東送上生日祝福，令黃建東大感窩心：「雖然我生日過咗個幾禮拜，但佢一見到我就畀咗個Birthday hug同wishes我，such a sweet sweetheart！阿安，你加油呀，我睇好你㗎！新進國民甜心！」