蔡少芬教「港普F4」講潮語　自嘲「硬硬的屎」？

藝人蔡少芬嘅「港普」出晒名，雖然普通話講得唔標準，但反而更受歡迎，而其實佢亦相當熟悉內地嘅潮語，近日佢喺內地綜藝節目《請吃飯的姐姐》，就教另外3位「港普F4」好友朱茵、洪欣及陳法蓉講內地潮語，其中佢問大家咩係「YYDS」，洪欣同朱茵一頭霧水，蔡少芬即笑住話：「很多人都是這樣形容我」，並開估：「永遠的神」（永遠的神國普通話譯音），即被洪欣寸爆：「你是不是誤會了？他們說你神經病。」蔡少芬即用手中嘅扇拍向洪欣，示意：「你閉嘴！」非常搞笑。

而呢段片即引起網民熱議，其中有網友製作短片，指YYDS除了「永遠的神」外，仲有其他意思，如「以一敵三」、「陰陽大師」，甚至笑指係「硬硬的屎」嘅意思，而蔡少芬亦有留意到，並笑言：「原來另有意思...硬硬的屎！太喜歡了！陳法蓉在形容你啦！」陳法蓉即反擊：「硬硬的屎！笑死我了，說的就是娘娘（蔡少芬）！」洪欣就表示：「你們說這些污穢的東西，我真的說不出口，因為我是最高貴的。」