鏡粉謝影雪作客ViuTV　與MIRROR同場勁淡定

港隊羽毛球代表謝影雪早前被發現於東奧奧運村邊播MIRROR歌曲邊作鍛煉，被踢爆「鏡粉」身份，返港後她與粉絲網上搞「你問我答」環節，當時她豪氣指一向用左手打波，倘若與MIRROR對戰的話，自己可改用右手讓賽。

昨晚（8日）ViuTV直播東奧閉幕，成功邀得阿雪與好拍檔鄧俊文現身直播室，與MIRROR同場。阿雪表現相當大方，鏡頭前未有表露興奮情緒，反而坐在其身後的姜濤、Anson Lo及Edan等不停扮鬼臉「搶鏡」，令人忍俊不禁。問到最想親近MIRROR哪位成員？阿雪淡定回道：「小朋友先會做選擇。」令全場歡呼，俊文則表示：「我就梗係AK（Anson Kong）啦。」

隨後Lokman則代表MIRROR向兩位運動精英「下戰書」，不過搞笑是邀請他們出席稍後舉行的《夏日有團伙力圖打排球》，就連主持亦嘖嘖稱奇：「乜唔係打羽毛球咩？」Lokman笑言：「因為我哋係球類高手，奧運有咁多球類比賽，我哋乜嘢都玩晒！」