傳跟羅天宇拍拖4個月　何依婷呼冤：唔係好熟

藝人羅天宇前度個個靚女，有苟芸慧、湯洛雯，而傳出緋聞就有陳瀅同戴祖儀，個個都係女神級，唔怪得之佢被稱為「女神收割機」，係男人嘅偶像！最近就有消息指33歲嘅羅天宇溝掂樣靚身材正嘅何依婷，有傳兩人已經秘戀4個月，更被指在煞科宴上偷偷拖手，又一齊去夾公仔，但兩人戀情不被何媽媽祝福，有指何媽媽有感羅天宇形象花心，而女兒前途一片光明，不欲女兒因拍拖阻礙事業發展。

對此，何依婷接受東網訪問時，直呼冤枉否認戀情：「唔係好熟，拍劇係朋友，大家都係工作上好努力嘅人，唔想同工作拍檔有不必要無謂嘅關係，夾公仔係劇集情節，而唔係我哋去夾公仔，完咗工作後冇私底下見過面，好無聊呀！希望大家唔好亂諗啦！（煞科宴偷偷拖手？）拍劇嗰陣有囉，但完咗就完全冇聯絡喇！」

而羅天宇接受東網訪問時說：「其實我單身咗好耐，可唔可以唔好咁樣寫我，唉，個個都覺得我好多感情發生咁，其實唔係，我不嬲都自己一個。（快啲搵到真命天女？）暫時未遇到，開劇都好忙，出現時候再算，依家未有。」