加料送埋DNA！謝霆鋒剝衫贈「有味Tee」冧粉絲

男神謝霆鋒最近忙於為英皇電影《怒火》宣傳，呢日佢現身謝票活動時，有粉絲嗌上台話想要霆鋒着緊嗰件Tee，霆鋒面露尷尬笑容，諗咗一陣即做出剝衫動作，惹嚟全場尖叫！而霆鋒即場剝衫嗰陣，仲加料用口咬住件Tee，令到件Tee染晒霆鋒啲口水DNA，之後佢雙手將件「有味Tee」送畀個男粉絲，搞到個男粉絲興奮到手都震埋添！

霆鋒贈送「有味Tee」即成為網民熱話，有唔少網友話好想要霆鋒件衫，但係有女粉絲就留言表示不滿，話霆鋒只係寵愛男粉絲，冷落咗女粉絲喎，咁樣霆鋒下次要男女都送就皆大歡喜啦！而有網友就話：「我唔想要衫，我想要霆鋒。」睇嚟要霆鋒要滿足晒所有粉絲要求，真係一啲都唔容易呀！