鰂魚涌變北京道爆槍戰！甄子丹：近年港產片好難睇到

由兩大型男謝霆鋒同甄子丹合作嘅英皇電影《怒火》，日前舉行優先場，即獲業界一致推崇，大讚劇力十足，場面浩大，拍出久違嘅港產動作片味道。其中北京道駁火一場戲，更加劇力萬鈞。雖然之前講過係用綠幕以CG效果拍攝，但由於部分場面以實景拍攝，邊場係真？邊場係假？真係傻傻分不清。

原來今次尖沙咀北京道嘅場口，係喺鰂魚涌搭景而成，佔地40,000萬呎，甄子丹接受訪問時透露，此乃近年港片難得嘅場面：「呢度搭咗尖沙咀北京道及廣東道街景，除咗拍廠景都有實景拍攝，部分鏡頭真係移師北京道去拍，好難申請！在近年港產片好難看到。」

至於霆鋒亦盛讚呢幕係全片嘅重頭戲，而且火藥味十足：「香港電影好耐冇一部火力十足嘅戲，單喺呢個場景差唔多開近萬發子彈，每日開槍花費都好幾十萬，加上我從小開始追着丹爺嘅戲來學習，可以再合作是好開心的事！」