結婚12周年晒大大紮玫瑰　丁子高冧招氹楊千嬅一笑

藝人楊千嬅同老公丁子高一向恩愛，近年佢哋頻頻以夫妻檔接真人騷，更加名正言順咁公開放閃，又畀大家更了解佢哋煙韌嘅生活，一轉眼原來佢哋已經嚟到結婚12周年紀念，呢大日子丁子高當然唔會唔記得，即刻喺社交網晒出同千嬅燭光晚餐嘅冧照，佢仲送上超大紮紅玫瑰花，氣氛浪漫幸福，就連慶祝嗰舊Cake上面都有玫瑰花瓣，又從後挨實老婆，真係氹招盡出，唔怪得夫妻恩愛咁多年都冇變過啦！