方力申21年剪髮唔使錢慳50幾萬　去日本終於破戒

東京奧運完結，藝人方力申因工作關係會在當地留多幾日，佢就繼續拍片分享今次日本之旅，健康嘅佢每日朝早都會游水，已經游咗7次咁多。

喺東京已逗留近3星期，小方嘅頭髮開始長，由於返港要隔離，所以佢忍受唔住決定喺東京剪髮，咁就爆出原來佢有一個大秘密：「今次係21年來再自己畀錢搵髮型師剪頭髮。」小方解釋本身有御用贊助嘅髮型師，唔計平時拍戲造型，有其他髮型師整過頭，所以佢話：「我髮型師個Level剪個髮都要千幾蚊，所以我保守估計21年來慳咗50幾萬港幣，夠買架靚車！不過我都驚畀本身個髮型師鬧，因為如果個頭郁過，佢都會知！」

剪完頭髮，小方就約日本嘅朋友去食好嘢，由於餐廳上個月先喺東京開，佢就話：「相信冇人嚟過，今次我巴閉啦。」佢幫襯一間任食日本放題，見佢嗌到成枱都係，又拖羅又海膽，而今餐嘅價錢都Ok，只係800港元一個，真係恨死人！