《流星花園》開始不和　言承旭大S破冰首「合體」

台灣男神言承旭最近現身《披荊斬棘的哥哥》，第一集佢又再唱番佢F4時期嘅首本名曲《流星雨》，令粉絲嘅回憶N次湧現，不過今次節目組就為佢搞搞新意思，竟然搵嚟當年同佢合作爆紅台劇《流星花園》嘅女主角「杉菜」徐熙媛（大S），作為佢爆出婚變後首次「現身」！

44歲言承旭係今次節目中較為有睇頭嘅參賽藝人，佢忽然聽到大會播出大S獻聲嘅打氣說話，大S一開口就興奮大嗌：「道明寺，我是你的杉菜！」佢就直言以前兩個人拍劇時動不動就互相「耍彆扭（有爭拗）」，當時就認為對方係一個「高深莫測的死小孩」，依家反而變成一個大哥哥，比以前開朗、有魅力：「你是我人生中第一個男主角…道明寺，杉菜永遠都在！」明顯透露出兩人已冰釋前嫌。

當年爆紅後，二人一直傳出不和，心直口快嘅大S更曾喺媒體前大鬧：「言承旭真的很怪，根本無法和他相處，也不想再合作！」又爆料言承旭成日都無端端發脾氣，令佢覺得無法好好相處，分道揚鑣足足20年，到依家先再次「合體」。