同方力申开Live！张家朗首回应同江旻憓绯闻：我比较怕丑

香港剑神张家朗喺东奥上勇夺金牌，唔少人都想知多啲佢嘅心路历程，寻晚（14日）方力申就联同无綫体育记者何振然及主持庄琬晴同张家朗开Live倾偈，提到佢金牌战最后嗰1分被对方挑战，张家朗就话要配合裁判唔好斗气，方力申就笑言：“系呀，我都唔同啲记者斗气，同啲记者斗气我冇得捞㗎喇！”引来一片笑声！其中讲到8强落后9比14一场赛事，差一分就会输，佢就话只系向前望，冇谂结果，嗰一刻净系继续打！方力申就问佢：“即系冇谂过一分一分追到时，就嚟得、挨埋佢？”张家朗就话当刻好专注，冇特别去睇个分！

而最后适逢寻日系七夕情人节，方力申就叫佢同睇紧Live嘅6千几人讲吓有关七夕嘅说话，张家朗就笑晒口祝大家情人节快乐，仲主动提到“微笑剑后”江旻憓（Vivian），首次回应两人绯闻，佢话：“其实我哋系冇嘢嘅，我亦都唔系锺意佢，只不过我个人比较怕丑，所以嗰阵时大家话邀佢入Live、Facetime，我就比较怕丑，完全冇任何意思，系呀，只不过我个人系咁…”方力申就笑言：“低调啲！好正常啫吓话…大把机会吓嘛…我哋呢度4个，4个都系单身，等观众帮我哋宣传吓几好呀，大家都可以为自己奋斗嘅嘢而努力！”何振然就话“事业为重”，张家朗闻言都点晒头！虽然系咁，网民都笑言“愈描愈黑”，大赞张家朗同江旻憓好衬，希望呢对金童玉女有日可以“打”出爱火呀！