MV花絮曝光！Edan暖男上身　照顧女神周秀娜

人氣男團MIRROR成員Edan（呂爵安）憑劇集《大叔的愛》人氣急升，近日佢推出嘅新歌《小諧星》同樣大獲好評，MV至今累積逾240萬觀看次數，成績理想。呢日Edan再晒出MV嘅花絮片段，自爆為MV Chur到盡，事關佢本來已經工作忙到爆，連續多日都睡眠不足瞓得4個鐘，而到正式拍MV當日更由朝早9點開始，一路直踩到凌晨4點，再撞正落大雨，令落水戲一再拖遲。

雖然最後都趕得切喺暴雨前完成拍攝濕身戲份，不過當離場時，卻因為狂風暴雨，而令正落樓梯嘅Edan一度險扭親，但貼心嘅佢反而第一時間提醒身後嘅女主角周秀娜注意安全，認真係暖男。另外，佢透露於拍MV前數日前先收到琴譜，故為免阻住拍攝進度，故一有時間就不斷狂練，相當專業。