胡定欣開Live吸Like　孖陳山聰袁偉豪變臉

視后胡定欣係TVB藝人中社交平台最多粉絲嘅一位，定欣昨晚（15日）喺社交平台開直播，講講吓仲Add埋好友陳山聰、袁偉豪入嚟，佢哋3個雖然啱啱先遊完船河，但喺直播入面依然講到冇停口，之後黃智雯都加入一齊傾！定欣話：「嘩！頭先我得千幾人睇，依家有埋你哋有4千幾人睇！」袁偉豪即謂：「吓！你啲Post下下都萬幾人Like㗎喎！」

之後佢哋繼續講啲無聊笑話，最好笑嘅都係陳山聰，不停喺自己面上加Effect，一時化晒眼妝、搽晒口紅，一時又玩染髮，後尾仲變埋聖誕老人！搞到袁偉豪猛問山聰喺邊度撳到咁多effect出嚟，然後全部人都跟住係咁「變臉」，相當搞笑！

而山聰似乎開Live玩上癮，今晚（16日）於開工放Break時專登返屋企睇囝囝Jaco，仲開埋直播，Jaco仔相當可愛，學緊講嘢嘅佢不停咿咿呀呀，又用手仔打招呼！跟住胡定欣同胡蓓蔚都加入，每次Jaco被定欣抱時都皺晒眉唔識笑，今次都不例外，不論定欣扮Bunny或唱Baby Shark，佢都係冇反應，但Jaco一望住老竇山聰，就好冧呢！