三屆視帝羅嘉良離巢無綫　原因係錢！

藝人羅嘉良主演嘅劇集《先生貴性》最近重播，即時掀起網友回憶！羅嘉良演技出色，曾經拎過三屆視帝，當年因咩事搞到佢離巢無綫呢？藝人黃一山（細龜）拍片爆料，揭開羅嘉良出走原因！

細龜話自己同羅嘉良關係唔錯，佢話：「2003年拍完《流金歲月》，拎咗第三次視帝之後，佢就好瀟灑咁離開無綫。」細龜追問羅嘉良點解離開無綫，唔想攞多幾次視帝？羅嘉良就答佢：「喺無綫都做咗超過20年，但搵嘅收入唔多，反而一出去拍劇，拍一年嘅收入，都超過無綫20年嘅收入，咁點解唔走呀？」

羅嘉良近年主力內地發展，早前佢出席內地商場商演，有網友將片段擺上網，見現場人數甚少，舞台設計簡陋，只有幾個音響放喺台邊，加上羅嘉良神情落魄，網友都為呢位三屆視帝感到唏噓！