譚嘉儀33歲生日艷福無邊　天堂鳥張明偉半裸陪出海

藝人譚嘉儀上星期五（13號）33歲生日，圈中人緣甚廣嘅佢尋日（18號）仲慶祝緊生日，獲一班好友舉行海上派對慶生。遊艇上布置「KAYEE Happy Birthday」backdrop，仲有粉色氣球裝飾，加埋皇冠生日蛋糕，譚嘉儀似足公主一樣，備受大家寵愛。講到最矚目，一定係水着方面，壽星女着咗一件頭泳衣，大騷事業線，而出席藝人包括龔柯允、曾參加ViuTV真人騷《YOLO的練習曲》嘅KOL戴月（Kikko）為免搶主人家風頭，着得較為密實。

相反，俊男們前天堂鳥成員Gordon、Lincoln以及《愛．回家之開心速遞》飾演George嘅張明偉，齊齊脫下上身玩半裸騷肌，3位猛男圍住壽星女，艷福無邊。