《天龍八部》2021評分仆直　選角出事惹眾怒！

武俠小說《天龍八部》再次被翻拍成影視作品，2021年新版本最近播出，點知網上劣評如潮，雖然卡士上有多位為人熟悉嘅演員，不過依然逃唔過網友負評嘅結局，本月14日先首播，就已經喺內地影視平台評分低開3.5/10分，成過往《天龍八部》劇集版評價最差嘅一部，成績慘不忍睹。

網友狠批新劇選角問題太大，當中豪邁嘅主角「喬峰」搵嚟台灣演員楊祐寧飾演，佢搣唔甩文青形象，未有成功展示「主角相」，而「段譽」一角就由白澍飾演，即刻變娘，港人熟悉嘅徐冬冬竟被評為「最醜刀白鳳」，就連女主角「王語嫣」亦被狠批冇仙氣。

反而擁最高評分9/10分嘅一個版本，就係1997年《天龍八部》由李添勝監製、黃日華飾演「喬峰」、李若彤飾演「王語嫣」嘅作品，二人曾被封為同小說形象相似度最高嘅一Pair。